Abuztuaren 21ean eta 28an Baserri Antzokiko Eszenara jaialdiko azken partea eskeini genuen. 21ean Taberna Ibiltaria eta Lainomendi Dantza Taldearen esku, eta 28an Ander, Beñat eta Aritz izan ziren protagonistak. Lehenak, dantzak eta euskal kantak nahastu zituzten folklorez beteriko arratsalde eguzkitsuan. Bigarrenak, eta egun euritsua izan arren, bertsoak tartekatuz erromeri kantaz eta rockaz nahasturiko saioa eskeini zuten. Giro paregabea martxoan bertan behera geratutako jaialdia burutzeko, eta beraien jarrera txalotzeko eta eskertzekoa. Momentu oso bereziak utzi zituzten, beste askoren artean, Aritzen hurrengo bertsoa:
Saioa hastera badoa eta
hurbildu mahaien artera
patxadaz jarri aulkian eta
trago pare bat hartzera.
Esan behar dut zoaztenean
trago horiek pagatzera
gero txapela pasako dugu
eta ez gorde kartera.
Txapelarena txantxa zen baina
zaila dago egoera
koroatuta omen gaude gu
nobleziaren antzera.
Uda osoa egon eta gero
ez aurrera ez atzera
bihotz bihotzez eskertzen dugu
hemen jotzeko aukera.
Entzule maite zure aurrera
heldu gara eta, ejem
esperimentu berri honekin
ahal den onena ematen.
Ez dugu inoiz egin gaurkoan
egingo duguna hemen,
gu sufritzera etorri gara
zuek gozatu deizuen.
